Кондак 1

Избра́нный чудотво́рче и во́ине Христо́в, устрои́телю оби́тели преди́вныя, наста́вниче мона́хов и собесе́дниче А́нгелов! Похва́льное пе́ние прино́сим ти, преподо́бне о́тче наш Влади́мире, ты же, предстоя́ Престо́лу Го́спода сла́вы, моли́ о нас, прославля́ющих тя с любо́вию и умиле́нно вопиющи́х: Ра́дуйся, Влади́мире, Белопесо́цкий чудотво́рче.

Икос 1

А́нгел земны́й и челове́к небе́сный вои́стинну был еси́, преподо́бне о́тче наш Влади́мире, изде́тска бо стра́ху Бо́жию роди́тели твои́ми науче́нный, в преподо́бии и пра́вде во вся дни живота́ твоего́ неле́ностно Го́сподеви порабо́тал еси́. Мы же, удивля́ющеся равноа́нгельному житию́ твоему́, прославля́ем тя си́це:

Ра́дуйся, земли́ Тверски́я прозябе́ние свято́е;

ра́дуйся, гра́да Рже́ва отрасль пречестна́я.

Ра́дуйся, сла́вных роди́телей плод боголюбе́зный;

ра́дуйся, луча́ми Трисо́лнечнаго све́та  от ю́ности озаре́нный.

Ра́дуйся, любо́вь к доброде́тели от младе́нчества яви́вый;

ра́дуйся, на служе́ние Христо́во се́рдце твое́ устреми́вый.

Ра́дуйся, писа́ньми боже́ственными ду́шу твою́ напита́вый;

ра́дуйся, вся блага́я ми́ра сего́ ни во что же вмени́вый.

Ра́дуйся, Влади́мире, Белопесо́цкий чудотво́рче.

Кондак 2

Ви́дев, преподо́бне, я́ко образ ми́ра сего́ прехо́дит и вся́кая жите́йская сла́дость прича́стна печа́ли в нем быва́ет, восхоте́л еси́ Христу́ Бо́гу послужи́ти и Тому́ еди́ному после́довати. Сего́ ра́ди и во оби́тель Ху́тынскую стопы́ твоя́ напра́вил еси́, иде́же, усе́рдно в моли́тве подвиза́яся, Бо́гу взыва́л еси́: Аллилу́иа.

Икос 2

Ра́зум, заря́ми Ду́ха Свята́го просвеща́емь, стяжа́л еси́, богому́дре, и ева́нгельски Бо́га, в Трие́х Ипоста́сех пева́емаго, всем се́рдцем возлюби́л еси́, те́мже, ум твой к Божественному желанию впери́в, я́ко ве́рный раб, пред Го́сподем ходи́л еси́. Помози́ у́бо нам до́брым по́двигом подвиза́тися, тя прославля́ющим и си́це вопию́щим:

Ра́дуйся, Спаси́теля Христа́ и́стинный после́дователю;

ра́дуйся, зако́на Бо́жия усе́рдный исполни́телю.

Ра́дуйся, а́гнче кро́ткий и незло́бивый;

ра́дуйся, па́стырю до́брый и чадолюби́вый.

Ра́дуйся, сосу́де Божия благода́ти избра́нный;

ра́дуйся, мно́гими доброде́тельми украше́нный.

Ра́дуйся, дре́вних отце́в до́брый ревни́телю;

Ра́дуйся, оби́тели святы́я му́дрый устрои́телю.

Ра́дуйся, Влади́мире, Белопесо́цкий чудотво́рче.

Кондак 3

Си́ла Вы́шняго, немощна́я врачу́ющи и оскудева́ющая восполня́ющи, укрепи́ тя, преподо́бне Влади́мире, егда́ восприя́л еси́ мона́шеский о́браз и основа́ние кре́пкое ле́ствицы доброде́телей поста́вил еси́. Мы же, зря́ще таково́е тща́ние твое́ и усе́рдие о спасе́нии души́ твоея́, Всеси́льному Бо́гу со умиле́нием пое́м: Аллилу́иа.

Икос 3

Иму́ще тя, преподо́бне Влади́мире, те́плаго моли́твенника и ско́раго в беда́х помо́щника, благове́рнии лю́дие, и́ноцы и и́нокини в ско́рбех и напа́стех тя в моли́тве призы́вают и, по́мощь вско́ре улуча́юще, благода́рне тебе́ вопию́т:

Ра́дуйся, в ско́рбех на́ших утеше́ние преди́вное;

ра́дуйся, оби́тели твоея́ заступле́ние незри́мое.

Ра́дуйся, и́ноков, до́бре подвиза́ющихся, учи́телю;

ра́дуйся, о́бщаго жития́ их устрои́телю.

Ра́дуйся, Христа́ всем се́рдцем возлюби́вый;

радуйся, жи́знь твою́ за Него́ в по́двизех положи́вый.

Ра́дуйся, боля́щих врачу́ ско́рый и безме́здный;

ра́дуйся, наста́вниче прему́дрый и прозорли́вый.

Ра́дуйся, Влади́мире, Белопесо́цкий чудотво́рче.

Кондак 4

Бу́рю злых напа́стей усе́рдною моли́твою укроща́я, и на высоту́ доброде́телей восше́д, возсия́л еси́, о́тче Влади́мире, я́ко свети́льник на све́щнице поста́вленный. Те́мже и са́на свяще́нства удосто́ился еси́ и послуша́ния ра́ди игу́менство восприя́л еси́, со смире́нием взыва́я к Бо́гу: Аллилу́иа.

Икос 4

Ви́девше лю́дие ангелоподо́бное твое́ житие́, о́тче Влади́мире, разуме́ша тя и́стиннаго по́стника и пра́вило изве́стнейшее доброде́тели, сего́ ра́ди и прихожда́ху, послу́шати сладкогла́сная твоя́ словеса́. Мы же, ча́да твоя́, почита́юще па́мять твою́, дерза́ем глаго́лати си́це:

Ра́дуйся, во́ине Христо́в непобеди́мый;

ра́дуйся, ра́бе Его́ благи́й и ве́рный.

Ра́дуйся, моли́тву, я́ко щит, стяжа́вый;

ра́дуйся, де́монския прило́ги то́ю отража́вый.

Ра́дуйся, призыва́ющих тя любе́зный послу́шателю;

ра́дуйся, моли́тв их ско́рый исполни́телю.

Ра́дуйся, олтаря́ Госпо́дня усе́рдный служи́телю;

ра́дуйся, и́ноков до́брый па́стырю и му́дрый учи́телю.

Ра́дуйся, Влади́мире, Белопесо́цкий чудотво́рче.

Кондак 5

Богосве́тлая звезда́, в нощи́ жития́ сего́ при́сно светя́щая, яви́ся оби́тель твоя́, преподо́бне Влади́мире, ю́же ты в преде́лех земли́ Моско́вския в похвалу́ Пресвяты́я Тро́ицы созда́л еси́, в нейже мно́зи и́ноцы, до́брым по́двигом подвиза́ющеся, Богу хвалу приноша́ху, пою́ще песнь: Аллилу́иа.

Икос 5

Ви́дев, преподо́бне, я́ко ве́ра в земли́ Ру́сстей угаса́ет и грехо́в ра́ди бе́ды и ско́рби  Пра́ведный Судия́ попуска́ет, глаго́лал еси́: пока́йтеся, да не прогне́вается до конца́ Госпо́дь; не хо́щет бо сме́рти гре́шника, но е́же обрати́тися и жи́ву бы́ти ему́. Сия́ глаго́лы разуме́вше, мно́зи на путь пра́вый возврати́шася, те́мже и воспева́ху тебе́:

Ра́дуйся, покая́ния и жи́зни по Бо́зе пропове́дниче;

ра́дуйся, бе́дствующим ско́рый помо́щниче.

Ра́дуйся, хода́таю на́шего спасе́ния;

ра́дуйся, богому́дрый учи́телю терпе́ния.

Ра́дуйся, скорбя́щих ско́рое утеше́ние;

ра́дуйся, нему́дрых пра́ведное вразумле́ние.

Ра́дуйся, грехо́в и страсте́й смире́нный обличи́телю;

ра́дуйся, Ева́нгелия Христо́ва усе́рдный благовести́телю.

Ра́дуйся, Влади́мире, Белопесо́цкий чудотво́рче.

Кондак 6

Пропове́дует оби́тель Белопесо́цкая труды́ и по́двиги твоя́, преподо́бне, спасе́ния ра́ди души твоея́ подъя́тыя. Вои́стинну, дре́вним отце́м подража́я, пусты́ни прозябе́ние многопло́дное яви́лся еси́, дарми́ Ду́ха Свята́го украше́нный, Его́же де́йствием мно́гая и пресла́вная чудеса́ соверши́л еси́, подвиза́я ве́рных воспева́ти Бо́гу: Аллилу́иа.

Икос 6

Возсия́л еси́, я́ко свети́льник пресве́тлый, во оби́тели твое́й, богому́дре о́тче Влади́мире, мно́гия и́ноки на стезю́ спасе́ния наставля́я и всех приходя́щих к тебе́ с любо́вию утеша́я, яви́ бо тя Христо́с му́драго наста́вника и учи́теля пустыннолю́бнаго. Сего́ ра́ди прино́сим ти похвалы́ сия́:

Ра́дуйся, пусты́нниче, мирску́ю честь презре́вый;

ра́дуйся, подви́жниче, дре́вним отце́м подража́вый.

Ра́дуйся, Правосла́вия и благоче́стия предо́брый учи́телю;

ра́дуйся, жития́ и́ноческаго му́дрый устрои́телю.

Ра́дуйся, трудолю́бия усе́рдный наста́вниче;

ра́дуйся, неду́гов теле́сных и душе́вных целе́бниче.

Ра́дуйся, Пречи́стыя Богоро́дицы ве́рный служи́телю;

ра́дуйся, те́плый о нас пред Бо́гом предста́телю.

Ра́дуйся, Влади́мире, Белопесо́цкий чудотво́рче.

Кондак 7

Хотя́ спасти́ ду́шу твою́, преподо́бне Влади́мире, сам себе́ в же́ртву прия́тну Го́сподеви прине́сл еси́, име́я дух сокруше́н и се́рдце смире́нно. Те́мже и Бог тя прослави и дарова́ часть со святы́ми в Ца́рствии Небе́снем, иде́же с ни́ми, ра́достно лику́я, пое́ши песнь: Аллилу́иа.

Икос 7

Но́ваго тя хода́тая, свя́те Влади́мире, пред Престо́лом Бо́жиим стяжа́хом, ты бо в житии́ твое́м Пресвяте́й Тро́ице усе́рдно послужи́л еси́ и во оби́тели чу́дней, тобою в крае Ступинском устро́енней, ре́вностно подвиза́лся еси́. Сего́ ради́ прославля́ем тя си́це:

Ра́дуйся, земли́ Моско́вския похвало́ и утвержде́ние;

ра́дуйся, оби́тели Пресвяты́я Тро́ицы при́сное заступле́ние.

Ра́дуйся, подвиза́ющимся в ней благода́тное вспоможе́ние;

ра́дуйся, су́щим в ско́рбех и печа́лех ско́рое утеше́ние.

Ра́дуйся, Еди́наго Бо́га в Трие́х Ипоста́сех всем се́рдцем возлюбивый;

ра́дуйся, Отца́ Небе́снаго в житии́ твое́м просла́вивый.

Ра́дуйся, Сы́на Бо́жия благоче́стно испове́давый;

ра́дуйся, Ду́ху Свято́му верно поклони́выйся.

Ра́дуйся, Влади́мире, Белопесо́цкий чудотво́рче.

Кондак 8

Стра́нная и пресла́вная зна́мения благоволе́ния Бо́жия зря́ще, прославля́ем тя, преподо́бне о́тче наш Влади́мире. Се бо днесь, я́коже дре́вле, притека́ющим к тебе́ с ве́рою утеше́ние в ско́рбех подае́ши, от бед избавля́еши, от напа́стей сохраня́еши и вся́кое проше́ние во бла́го исполня́еши, подвиза́я Бо́гу воспева́ти песнь: Аллилу́иа.

Икос 8

Все плотско́е жела́ние ду́ху покори́в, теле́сныя стра́сти му́жественне победи́л еси́, преподо́бне о́тче Влади́мире, и, я́ко безпло́тен на земли́ пожи́в, в Небе́сных селе́ниих со А́нгелы водвори́лся еси́. Те́мже, удивля́ющеся таково́му житию́ твоему́, прославля́ем тя си́це:

Ра́дуйся, страсте́й душевре́дных искорени́телю;

ра́дуйся, послуша́ния смире́нный люби́телю.

Ра́дуйся, умерщвле́нием страсте́й ми́ру уме́рый;

ра́дуйся, себе́ сама́го в же́ртву Бо́гу принесы́й.

Ра́дуйся, А́нгелов собесе́дниче и преподо́бных соприча́стниче;

ра́дуйся, Небе́снаго Ца́рствия досто́йный насле́дниче.

Ра́дуйся, тле́нная и скороги́бнущая презира́ти поуча́яй;

ра́дуйся, Го́рняя, а не земна́я, му́дрствовати наставля́яй.

Ра́дуйся, Влади́мире, Белопесо́цкий чудотво́рче.

Кондак 9

Вся́кое тща́ние прилага́л еси́, богому́дре Влади́мире, е́же со́зданную тобо́ю оби́тель благопло́дный вертогра́д сотвори́ти, да вси, хотя́щии в ней усе́рдно подвиза́тися, плоды́ трудо́в твои́х наслажда́ются, воспева́юще Бо́гу: Аллилу́иа.

Икос 9

Вети́и многовеща́ннии ве́ка сего́ не мо́гут пости́гнути жи́зни сокрове́нныя во Христе́, я́же есть пра́вда, мир и ра́дость о Ду́се Свя́те, и́хже взыску́я, преподо́бне,  невозвра́тным по́мыслом  Христу́ после́довав, тече́ние жи́зни твоея́ соверши́л еси́ и блаже́нства ве́чнаго дости́гл еси́. Помози́ у́бо и нам иска́ти пре́жде Ца́рствия Небе́снаго и пра́вды его, прославля́ющим тя си́це:

Ра́дуйся, Христа́ ра́ди плоть твою́ умертви́вый;

ра́дуйся, прему́дрых ве́ка сего́ посрами́вый.

Ра́дуйся, любому́дрия духо́внаго пода́телю;

ра́дуйся, чистоты́ серде́чныя усе́рдный храни́телю.

Ра́дуйся, во бране́х духо́вных посо́бниче;

ра́дуйся, во искуше́ниих ско́рый помо́щниче.

Ра́дуйся, гре́шником пути́ ко спасе́нию указа́телю;

ра́дуйся, за мир гре́шный пред Бо́гом предста́телю.

Ра́дуйся, Влади́мире, Белопесо́цкий чудотво́рче.

Кондак 10

Спасе́ния иски́й лю́дем, притека́ющим к тебе́, прехва́льне о́тче Влади́мире, поуча́л еси́ ве́ру Правосла́вную чи́сте соблюда́ти, Бо́га все́ю кре́постию люби́ти и безпоро́чно житие́ провожда́ти. Ны́не же, Престо́лу Бо́жию предстоя́, моли́ся в земли́ на́шей Правосла́вию утверди́тися, Оте́честву на́шему в мире и благоде́нствии пребыва́ти, оби́тели твое́й сохрани́тися и всем нам спасти́ся, да со все́ми святы́ми воспева́ем хвале́бную песнь: Аллилу́иа.

Икос 10

Стена́ спаси́тельная в дре́вняя времена́ бысть оби́тель твоя́, преподо́бне, от мра́ка грехо́внаго и язы́ческаго суеве́рия лю́ди отвраща́ющи и преде́лы Моско́вския от инове́рных защища́ющая. В после́дняя же ле́та попуще́нием Бо́жиим поруга́нию от безбо́жных предаде́ся, но па́ки возроди́ся, иде́же боголюби́выя се́стры, обе́ты и́ноческия исполня́юще, тя прославля́ют си́це:

Ра́дуйся, исто́чниче святы́й, духо́вную на́шу жа́жду утоля́яй;

ра́дуйся, еле́ю боже́ственный, сердца́ на́ша умягча́яй.

Ра́дуйся, и́скро, о́гнь любве́ в душа́х возжига́ющая;

ра́дуйся, ни́во, благода́тным хле́бом нас пита́ющая.

Ра́дуйся, целому́дрия и чистоты́ рачи́телю;

ра́дуйся, го́рдости и неве́рия искорени́телю.

Ра́дуйся, в недоуме́нии мысль бла́гу на сердце полага́яй.

Ра́дуйся, трезве́нию и непреста́нней моли́тве нас науча́яй.

Ра́дуйся, Влади́мире, Белопесо́цкий чудотво́рче.

Кондак 11

Пе́ние,в похвалу́ тебе́ соста́вленное, не пре́зри, преподо́бне Влади́мире. Днесь бо, ико́не твое́й предстоя́ще, с ве́рою и любо́вию ублажа́ем тя, я́ко засту́пника на́шего и предста́теля. Те́мже и мо́лимся: не оста́ви ны си́ры и безуте́шны, но помози́, еще́ в стра́нствии су́щим, безбе́дне мо́ре жития́ сего́ преплы́ти и Вы́шняго гра́да, Иерусали́ма Небе́снаго, дости́гнути, иде́же вку́пе с тобо́ю сподо́бимся воспева́ти песнь: Аллилу́иа.

Икос 11

Светоно́сным Тро́ическим сия́нием свы́ше озаре́нный, свя́те Влади́мире, просвети́ и на́ша сердца́, тьмо́ю грехо́вною омраче́нная, да, еле́ем благи́х дел возже́гше уга́сшия на́ша свети́льники, я́ко му́дрыя де́вы, сподо́бимся бра́чнаго Христо́ва черто́га, иде́же ты со все́ми святы́ми пребыва́еши. Те́мже и вопие́м ти:

Ра́дуйся, свеще́, огне́м Боже́ственныя благода́ти возжже́нная;

ра́дуйся, ча́ше, то́ки милосе́рдия Бо́жия нам излива́ющая.

Ра́дуйся, искуша́емым от ми́ра, пло́ти и диа́вола поможе́ние;

ра́дуйся, теле́с наших здра́вие и душ спасе́ние.

Ра́дуйся, вели́каго кня́зя, апо́столом ра́внаго, и́мя носи́вый;

ра́дуйся, игу́мену земли́ Ру́сския в по́двизе подража́вый.

Ра́дуйся, Небе́снаго Сио́на досто́йный жи́телю;

ра́дуйся, пред Престо́лом Бо́жиим наш те́плый предста́телю.

Ра́дуйся, Влади́мире, Белопесо́цкий чудотво́рче.

Кондак 12

Благода́ти Бо́жия сосу́д избра́нный быв, преподо́бне Влади́мире, благода́ть Пресвята́го Ду́ха и нам испроси́, да при́сно покры́ет нас от враго́в ви́димых и неви́димых. Научи́, свя́тче, подража́ти тебе́ в чистоте́ и незло́бии, да сподо́бимся узре́ти сла́ву Триипоста́снаго Божества́, воспева́юще победную песнь: Аллилу́иа.

Икос 12

Пою́ще мно́гия ми́лости и пресла́вная чудеса́ твоя́, богоблаже́нне Влади́мире, хва́лим, благодари́м и велича́ем просла́вльшаго тя Го́спода, ди́внаго во святы́х Свои́х. Тебе́ же, ве́рному и благо́му рабу́ Его́, от любве́ серде́чныя вопие́м та́ко:

Ра́дуйся, тече́ние по́стническое до́бре сконча́вый;

ра́дуйся, путе́м пра́вым непреткнове́нно ше́ствовавый.

Ра́дуйся, не сло́вом то́чию, но па́че житие́м поуча́вый;

ра́дуйся, и́ноком путь и́стинный ко спасе́нию указа́вый.

Ра́дуйся, терпением и упованием на Бога уныние побеждати научаяй;

ра́дуйся, лука́вых ко́зней вра́жиих избега́ти нам помога́яй.

Ра́дуйся, по преставле́нии твое́м при́сно с нами пребыва́яй;

ра́дуйся, во сла́ве Небе́сней Престо́лу Пресвяты́я Тро́ицы предстоя́й.

Ра́дуйся, Влади́мире, Белопесо́цкий чудотво́рче.

Кондак 13

О, преди́вный уго́дниче Христо́в, богому́дре о́тче наш Влади́мире! Приими́ ма́лое сие́ и недосто́йное моле́ние, от усе́рдия тебе́ приноси́мое, и умоли́ Го́спода сил, да ми́лостив будет непра́вдам на́шим и бу́дущих изба́вит муче́ний нас, в покая́нии зову́щих: Аллилу́иа.

 

Молитва

О, пресла́вный уго́дниче Христо́в, преподо́бне о́тче Влади́мире, прему́дрый наш наста́вниче, оби́тели Белопесо́цкия нача́льниче и земли́ Сту́пинския покрови́телю!Я́ко име́яй дерзнове́ние ко Влады́це Христу́ и Пречи́стей Его́ Ма́тери, бу́ди моли́твенник те́плый о нас, недосто́йных,[ подвиза́ющихся во святе́й оби́тели твое́й, и всех, с ве́рою притека́ющих на ме́сто сие́, иде́же многоле́тне те́лом почива́еши.]Испроси́, богому́дре, па́стырем ре́вность и попече́ние о пасо́мых, мона́шествующим споспе́шествуй в чистом житии, утеша́я их в ско́рбех и печа́лех и ми́лостивно подкрепля́я в боле́знех, заступи от всех бед и напа́стей ве́рная ча́да твоя́, сохраня́я от враг ви́димых и неви́димых.Наипа́че же моли́ся, свя́тче Бо́жий, Достопоклоня́емей Тро́ице, Ейже ты усе́рдно во вре́менней жи́зни послужи́л еси́,о еже́ в земли́ на́шей Правосла́вию утверди́тися и Оте́честву на́шему в ми́ре и благоде́нствии пребыва́ти.Нас же всех, почита́ющих святу́ю па́мять твою́, наста́ви в земне́м стра́нствии на путь спасе́ния и упра́ви к Ца́рствию Небе́сному, да та́мо вку́пе с тобо́ю и все́ми святы́ми просла́вим Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.